Policia e Tiranës ka finalizuar operacionin e koduar “Night”, duke goditur një rast të shpërndarjes së narkotikëve në kryeqytet. Në pranga ranë dy të rinj, Klejdi Picari, 21 vjeç, dhe Hysen Snalla, 27 vjeç, të cilët u ndaluan në rrugën “Mine Peza” duke lëvizur me një automjet tip BMW.

Gjatë kontrollit, Picarit iu gjetën doza heroine dhe kokaine, ndërsa Snallës doza kokaine. Policia sekuestruar gjithashtu pesë aparate celularë dhe automjetin e përdorur për shpërndarjen e drogave.

Operacioni u zhvillua nga Forca e Posaçme “Shqiponja” në bashkëpunim me Seksionin për Hetimin e Narkotikëve, si pjesë e masave të intensifikuara për goditjen e trafikut të narkotikëve të forta. Materialet procedurale iu kaluan Prokurorisë së Tiranës për veprime të mëtejshme.