Një aksident me pasojë vdekjen është shënuar në afërsi të vendit të njohur si “Ura e Peshkatarit”, në Tiranë. Një 56-vjeçar, duke drejtuar një autobus, ka përplasur për vdekje një këmbësor 46-vjeçar, identifikuar me inicialet Z. I.

Sipas Policisë, drejtuesi i mjetit, shtetasi N. H., është arrestuar në flagrancë nga shërbimet e qarkullimit rrugor. Viktima ka humbur jetën në vend si pasojë e përplasjes.

“N. H., 56 vjeç, pasi në afërsi të vendit të quajtur ‘Ura e Peshkatarit’, autobuzi që drejtonte ka aksidentuar këmbësorin shtetasin Z. I., 46 vjeç, i cili për pasojë ka humbur jetën”, thuhet në njoftimin zyrtar të Policisë së Tiranës.

Ngjarja është pjesë e bilancit ditor të Drejtorisë Vendore të Policisë Tiranë, e cila ka njoftuar edhe për një sërë arrestimesh dhe procedimesh penale për vepra të ndryshme, që nga dhuna në familje dhe konfliktet fizike, deri te drejtimi i mjeteve pa leje apo në gjendje të dehur.

Materialet procedurale për aksidentin fatal, ashtu si edhe për ngjarjet e tjera, i janë referuar Prokurorisë së Tiranës për veprime të mëtejshme hetimore.