Bido Carrisi, djali i vogël i këngëtarit italian Al Bano dhe Loredana Lecciso, i ka shpëtuar vetëm për pak një prej tragjedive më të rënda të javëve të fundit në Zvicër. Ai pritej të kalonte natën e Vitit të Ri në lokalin Le Constellation në Crans-Montana, ku një zjarr shkatërrimtar mori jetën e 40 të rinjve, por një ndryshim i papritur i planeve i shpëtoi jetën.

Lajmin e bëri të ditur vetë nëna e tij, Loredana Lecciso, në një intervistë për mediat italiane. Ajo tregoi se Bido frekuentonte shpesh lokalin dhe kishte lidhje të forta me zonën, pasi ishte diplomuar në Crans-Montana, kishte kaluar verat atje dhe e dashura e tij është nga ajo zonë.

“Familja ishte mbledhur për të festuar Krishtlindjet së bashku, ndërsa një nga alternativat për Vitin e Ri ishte qëndrimi në Zvicër. Megjithatë, në momentet e fundit, Bido dhe partnerja e tij vendosën të udhëtonin drejt Pulias për të pritur ndërrimin e viteve me familjen,” tregoi Lecciso.

Ajo shtoi se, nëse Bido do të kishte qëndruar në Crans-Montana, ishte pothuajse e sigurt se do të ndodhej në lokalin ku ndodhi tragjedia. “Ky ndryshim i fundit i planeve ishte vendimtar dhe kthimi në Cellino San Marco rezultoi shpëtimtar për djalin tim,” përfundoi ajo.

Ngjarja e Crans-Montana rikujton rëndësinë e vendimeve të vogla që shpesh mund të ndryshojnë fatin dhe tregon për fatin e jashtëzakonshëm të Bido Carrisit, i cili shmangu një fat tragjik që preku dhjetëra familje.