Shoferi i cili shkaktoi aksidentin tragjik në Kroaci do të qëndrojë 1 muaj në paraburg. Gjykata kroate ka marrë sot vendimin për masën e arrestit të 52-vjeçarit.

Disa ditë më parë ai drejtonte autobusin ku udhëtonin qytetarë nga Kosova teksa pas përmbysjes së autobusit 10 prej tyre vdiqën.

Dyshohet se aksidenti është shkaktuar nga lodhja e shoferit.  Sipas dëshmive, shoferin e kishte zënë gjumi në timon vetmë 30 minuta pasi e kishte marrë drejtimin e autobusit.

Në këtë aksident, 10 persona humbën jetën, 15 persona u lënduan rëndë, ndërsa 30 më lehtë.

Të lënduarit u transportuan në spitalin rajonal në Slavonski Brod, ku po mbahen për trajtim të mëtejshëm mjekësor.

Sipas gazetave kroate, shoferët e autobusit nga Kosova që po sillte emigrantët nga Frankfurti për në Prishtinë para aksidentit kishin pushuar në Bregana për gjysmë ore.

Aty ata ishin ndërruar dhe drejtimin e autobusit e kishte marrë shoferi tjetër.

Shoferi që vdiq nuk ishte në drejtimin e mjetit në momentin e aksidentit.

Shoferi i cili po drejtonte autobusin pranoi në Prokurori se për një moment e kishte zënë gjumi, dhe më pas autobusi kishte dalë nga rruga.