Kryetari i Partisë Demokratike, Sali Berisha, ka publikuar këtë të shtunë një denoncim në lidhje me kontrollet e ushtruara një ditë më parë nga Policia në Tiranë, për goditjen e call-centerave.

Sipas denoncimit, Policia ka zbarkuar në një call-center në zonën e Astirit, por efektivët dyshohet se janë tërhequr pas një telefonate nga Taulant Balla, i cili sipas Berishës është pronar i këtij call-center-i që merret me mashtrime financiare të tipit “forex”.

Në denoncimin e plotë, qytetari dixhital i referuar Berishës shkruan:
“Policia e Shtetit ka shkuar për të ushtruar kontroll në këtë call center për arsye të komunikimeve me agjencitë ligjzbatuese të një shteti tjetër. Në momentin e mbërritjes së forcave të policisë për kontroll, vetë Taulant Balla ka telefonuar policët, duke i detyruar të largoheshin menjëherë. Call-centeri është mbyllur përkohësisht dhe puna ka vijuar më pas normalisht.”

Denoncimi hedh dyshime mbi ndërhyrjen e mundshme të influencës politike në operacionet e policisë dhe ngre shqetësime mbi funksionimin e ligjit në rastet e mashtrimeve financiare. Policia nuk ka dhënë ende një reagim zyrtar mbi këto pretendime.