Prokuroria e Përgjithshme ka konfirmuar zyrtarisht se dokumentet e publikuara në media dhe nga opozita, që lidhen me dënimin penal të gjyqtares Irena Gjoka në Greqi, janë të vërteta dhe autentike. Sipas këtij konfirmimi, Gjoka ka qenë e dënuar dhe e dëbuar nga Greqia për falsifikim pasaporte dhe vize.

Rasti ka rikthyer në vëmendje debatin politik mbi reformën në drejtësi dhe rolin e institucioneve të reja, veçanërisht në raport me vendimmarrjen ndaj figurave të opozitës.

I ftuar në emisionin “Task Forcë”, gazetari Elkier Bushkolaj u shpreh se ky zhvillim provon, sipas tij, se reforma në drejtësi është përdorur si instrument politik për të goditur opozitën dhe për të favorizuar pushtetin. Ai deklaroi se vendimet e marra nga Irena Gjoka kanë pasur ndikim të drejtpërdrejtë në proceset zgjedhore të viteve të fundit.

“Vendimet e saj në raport me liderët e opozitës kanë impaktuar dhe kanë minuar në tërësi procesin zgjedhor, që nga zgjedhjet e pjesshme vendore, tek zgjedhjet vendore dhe deri te zgjedhjet e 11 majit. Ky është një dëm kolosal me pasoja afatgjata”, u shpreh Bushkolaj.

Sipas tij, rasti i Irena Gjokës ka peshë shumë më të madhe se rastet e përfshira në ligjin e dekriminalizimit, pasi ajo ka mbajtur edhe detyrën e drejtuese e komanduar e GJKKO-së, një nga institucionet kyçe të reformës në drejtësi, në bashkëpunim me SPAK-un.

Bushkolaj kritikoi gjithashtu rezultatet e luftës kundër korrupsionit dhe krimit të organizuar, duke theksuar se, ndërkohë që dosjet ndërkombëtare flasin për grupe kriminale me pasuri që arrijnë miliarda euro, sekuestrimet në Shqipëri kanë qenë minimale.

“Dosjet belge flasin për pasuri që kapin shifrën e 6 miliardë eurove nga trafiku i kokainës, ndërsa autoritetet shqiptare kanë sekuestruar vetëm rreth 6 milionë euro në disa vite”, tha ai.

Në këtë kontekst, gazetari përmendi edhe raste konkrete, si dosjet që lidhen me tenderat, përmbytjet në Durrës dhe aktivitetin e paligjshëm të call center-ave, duke pretenduar se mungesa e veprimit të drejtësisë ka lejuar vijimin e abuzimeve dhe ka minuar besimin publik te institucionet.

Sipas Bushkolajt, zvarritja për rreth 20 muaj e çështjes që lidhet me Irena Gjokën tregon, sipas tij, një koordinim institucional, për një proces që në kushte normale ligjore do të duhej të përfundonte brenda pak muajsh.