Një studim i fundit i kompanisë VPN Surfshark tregon se aplikacionet e fitnesit mund t’ju ndjekin edhe kur nuk jeni duke ushtruar. Analiza ka përfshirë 16 aplikacione të njohura për iPhone, ku mesatarisht secili aplikacion mbledh 12 lloje të dhënash nga 35 të mundshme që Apple i lejon.

“Nga 16 aplikacionet fitnes, 75% e tyre ndajnë të dhënat e përdoruesve me palë të treta,” deklaron Surfshark. Ky proces, i njohur si “tracking”, lidhet me të dhëna si ID përdoruesi, ID pajisjeje apo profile, të cilat mund të përdoren për reklama dhe analiza.

Fitbit rezultoi aplikacioni më “etës” për të dhëna, duke mbledhur deri në 24 lloje të dhënash, nga të cilat 19 nuk janë të nevojshme për funksionimin e tij. Në krahasim, Strava mbledh gjithashtu 21 lloje të dhënash jashtë funksionit kryesor të aplikacionit, ndërsa aplikacione të tjera si Nike Training Club dhe The Body Coach Workout Planner po ashtu grumbullojnë shumë të dhëna personale.

Disa aplikacione, si Centr, raportojnë mbledhjen vetëm të tre llojeve të dhënash bazë, ndërsa të tjera falas përdorin të dhënat tuaja për fitime nga reklamat. Aplikacionet me abonim vjetor, si PUSH Workout & Gym Tracker, mbledhin më pak të dhëna dhe nuk i përdorin për marketing, por kërkojnë pagesa direkte nga përdoruesit.

Raporti nxjerr në pah shqetësimin e përdoruesve për privatësinë, duke treguar se shumica e aplikacioneve fitnes nuk i përdorin të dhënat vetëm për aktivitetet sportive, por edhe për analiza, marketing dhe shpërndarje tek palë të treta.