Të paktën herë pas here, dëshira për një “gjë të ëmbël” është e natyrshme, qoftë një fetë tortë, një biskotë apo një cinnamon roll i ngrohtë. Megjithatë, ekspertët e shëndetit paralajmërojnë se teprimi me sheqerin mund të ketë pasoja serioze për organizmin. Sfida kryesore, sipas tyre, qëndron te fakti se sheqeri fshihet në shumë ushqime të përditshme, shpesh pa u vënë re nga konsumatorët.

Lajmi i mirë është se, sipas nutricionistëve, ulja e konsumit të sheqerit është e mundur pa hequr dorë nga snack-et e preferuara. Jessica Jones, bashkëthemeluese e platformës online të këshillimit ushqimor Diabetes Digital, shpjegon se një konsum i lartë i përditshëm i sheqerit mund të shkaktojë luhatje të vazhdueshme të energjisë dhe ndjesi lodhjeje. Ajo thekson se teprimi me sheqer lidhet gjithashtu me rritjen e rrezikut për diabet, sëmundje kardiovaskulare, hipertension, kolesterol dhe trigliceride të larta, inflamacion, si edhe çrregullime njohëse, përfshirë Alzheimerin dhe demencën.

Për këtë arsye, ekspertët rekomandojnë moderim dhe sugjerojnë disa strategji të thjeshta për ta ulur konsumin e sheqerit në jetën e përditshme.

Së pari, këshillohet kontrolli i kujdesshëm i etiketave ushqimore, veçanërisht rubrika e “sheqernave të shtuara”. Këto janë sheqernat që duhen kufizuar më shumë. Rekomandimi i përgjithshëm është të mos tejkalohen 25 gramë sheqer i shtuar në ditë. Përbërës si shurupi glukozë-fruktozë, dekstroza, agava, mjalti apo sheqeri i kokosit konsiderohen gjithashtu sheqerna të shtuara.

Një tjetër hap i thjeshtë është zëvendësimi i ushqimeve më të lehta për t’u modifikuar. Për shembull, drithërat e ëmbëlsuara të mëngjesit mund të zëvendësohen me tërshërë, kanellë dhe fruta, ndërsa salcat dhe dressing-et preferohet të zgjidhen ose të përgatiten pa sheqer të shtuar.

Ekspertët sugjerojnë gjithashtu uljen e sasisë së sheqerit në receta. Në shumë raste, sasia e sheqerit mund të reduktohet me një të katërtën ose edhe gjysmën, pa ndikuar ndjeshëm në shije. Alternativë tjetër është ulja e porcionit.

Kombinimi i karbohidrateve me proteina, yndyrna bimore ose fibra ndihmon në ngadalësimin e përthithjes së sheqerit dhe stabilizimin e nivelit të glukozës në gjak. Një shembull i thjeshtë është konsumimi i frutave së bashku me gjalpë kikiriku ose ushqime të tjera të pasura me proteina.

Një vëmendje e veçantë duhet t’u kushtohet edhe “sheqernave të lëngshme”. Pijet me sheqer përthithen shumë shpejt nga organizmi, ndaj rekomandohet kufizimi i tyre dhe, nëse konsumohen, të merren gjatë vakteve. Edhe ulja e sheqerit në kafe apo çaj mund të ketë ndikim të ndjeshëm.

Së fundi, ekspertët theksojnë rëndësinë e ushqimeve të papërpunuara ose pak të përpunuara. Një dietë e tillë e ul natyrshëm konsumin e sheqerit, pasi këto ushqime zakonisht nuk përmbajnë sheqer të shtuar dhe janë të pasura me fibra dhe mikronutrientë që ndihmojnë në përthithje më të ngadaltë të sheqerit, si frutat apo patatet, përfshirë edhe ato të ëmbla.

Sipas specialistëve, ndryshimet e vogla dhe të qëndrueshme në zakonet ushqimore mund të bëjnë një diferencë të madhe për shëndetin afatgjatë, pa sakrifikuar kënaqësinë e të ngrënit.