Tiranë – Policia e Tiranës goditi një tjetër rast të kontrabandës së mallrave, duke arrestuar në flagrancë një 26-vjeçar në afërsi të Kamzës. Sipas burimeve zyrtare, uniformat blu ndaluan automjetin që drejtohej nga Elton Kastrati, pas informacioneve të siguruara në rrugë operative.

Gjatë kontrollit në automjet, policia gjeti të fshehur rreth 524 gramë flori, veshje të ndryshme, paketa cigaresh, dy makina qepëse dhe sende të tjera. Hetimet paraprake tregojnë se Kastrati, në bashkëpunim me dy persona të tjerë, dyshohet se ka futur mallra në mënyrë të kundërligjshme në territorin e Shqipërisë.

Policia ka shpallur në kërkim dy bashkëpunëtorët e dyshuar dhe vijon punën për identifikimin dhe kapjen e tyre. Të gjithë mallrat e sekuestruara janë marrë në dorëzim nga autoritetet për vijimin e procedurave ligjore.