Një 34-vjeçare shqiptare ka humbur jetën në një aksident tragjik në Itali. Mediat italiane raportojnë se viktima, Xhuljana Guna, ishte duke ecur në trotuar kur u përplas nga një automjet pranë rrethrrotullimit të Santa Ceciliës, mëngjesin e ditës së djeshme.

Sipas raportimeve, drejtuesja e mjetit, një 37-vjeçare italiane, dyshohet se ka humbur kontrollin e makinës dhe pas përplasjes së fortë e ka marrë zvarrë të renë shqiptare. Si pasojë e plagëve të rënda, 34-vjeçarja nuk ka mundur të mbijetojë.

Autoritetet italiane kanë nisur hetimet për zbardhjen e plotë të rrethanave të aksidentit. Ndërkohë, drejtuesja e automjetit është shoqëruar në komisariat dhe, sipas mediave, ndodhet në gjendje shoku pas ngjarjes së rëndë.