Në një intervistë televizive, gazetarja Aida Topalli ka dhënë detaje të reja mbi tragjedinë e Xhuana Nikollit, 25-vjeçares shqiptare që humbi jetën pas një periudhe të gjatë dhune psikologjike dhe fizike nga ish-bashkëshorti i saj, Eraldo Fizi, i cili është shpallur në kërkim.

Topalli tha se Xhuana nuk ishte dhunuar vetëm nga Fizi, por edhe nga anëtarë të tjerë të familjes së tij, ku ajo kishte shkuar nuse në qershor të vitit 2025. Prindërit e saj kanë pasur dijeni për dhunën dhe kanë bërë një kallëzim për ish-bashkëshortin.

“Xhuana vendosi t’i japë fund jetës pas një kalvari vuajtjesh për shkak të dhunës psikologjike dhe fizike të ushtruar nga ish-bashkëshorti i saj. Por jo vetëm ajo, rezulton të mos jetë dhunuar vetëm nga ish-bashkëshorti, por edhe nga anëtarë të tjerë të familjes së tij,” tha Topalli.

Sipas gazetares, 25-vjeçarja po përgatitej për të filluar një punë të re dhe kishte blerë rroba për këtë fillim të ri në karrierë. Ajo kishte festuar më 9 mars me koleget dhe më pas ishte takuar me ish-bashkëshortin, ku gjatë natës kishte pësuar dhunë.

Në një letër të lënë për familjarët, Xhuana kërkonte falje dhe shprehte se nuk mund të lejonte që ata që e kishin dhunuar të vazhdonin ta dëmtonin. Tragjedia ka tronditur familjarët dhe komunitetin, ndërsa policia po vijon hetimet për zbardhjen e plotë të ngjarjes dhe kapjen e Fizit.