Ministri për Evropën dhe Punët e Jashtme, Ferit Hoxha, ka përkujtuar përmes një mesazhi publik ndërhyrjen e NATO në Kosovë, duke e cilësuar atë si një moment vendimtar në historinë moderne të rajonit.

“NATO ndërmori Operacionin Allied Force për të ndalur fushatën brutale të dhunës dhe spastrimit etnik të ndërmarrë nga Slobodan Milošević kundër shqiptarëve në Kosovë”, theksoi ai, duke shtuar se ishte një çast kur “dinjiteti njerëzor mbizotëroi mbi frikën”.

Hoxha vlerësoi gjithashtu rolin e Shqipërisë gjatë asaj periudhe, duke kujtuar se vendi hapi dyert për mijëra refugjatë, pavarësisht sfidave ekonomike, në një akt solidariteti që përfshiu institucione dhe qytetarë.

Në mesazhin e tij, ministri theksoi se sot Kosova qëndron si një shtet i lirë dhe i pavarur, një dëshmi e qëndresës dhe sakrificës së popullit të saj, ndërsa Shqipëria është një anëtare krenare e Aleancës që “ndali vdekjen dhe riktheu shpresën dhe dinjitetin”.

Ai përfundoi duke nënvizuar se rruga e Kosovës vijon drejt integrimit euro-atlantik, e mbështetur mbi vlerat e demokracisë, shtetit të së drejtës dhe të drejtave të njeriut.