Dy punëtorë ndërtimi me origjinë shqiptare janë arrestuar në Trento, Itali, pasi dyshohet se kanë rrëmbyer dhe dhunuar pronarin e firmës me të cilin bashkëpunonin. Ngjarja ka ndodhur pas një mosmarrëveshjeje për pagesën e punimeve të kryera.

Sipas hetimeve, konflikti nisi pas një emaili nga pronari i shtëpisë, i cili kundërshtoi cilësinë e punës së dy punëtorëve. Sipërmarrësi 60-vjeçar u përpoq të ndërmjetësonte dhe të siguronte pagesën për punëtorët, por ata, të bindur se nuk do të merrnin paratë, vendosën të vepronin vetë.

Dy punëtorët, të moshës rreth 30 vjeç, e thirrën sipërmarrësin në parkingun “ex Zuffo” në mes të ditës. Sapo ai mbërriti, e kapën me forcë dhe e futën në furgonin e tyre të bardhë. Brenda mjetit, sipërmarrësi u kërcënua që të transferonte paratë në llogaritë e punëtorëve dhe u godit disa herë në kokë.

Ngjarja përshkallëzohet më tej, pasi ata e çuan në kantierin ku ishin kryer punimet, duke tentuar të zgjidhnin konfliktin drejtpërdrejt me pronarin e shtëpisë, por pa arritur marrëveshje. Më pas, e rikthyen në parking dhe i morën çelësat e furgonit si formë presioni.

Edhe pas lirimit, sipërmarrësi ka marrë telefonata dhe mesazhe kërcënuese, që i kërkonin pagesën e shumës për punimet, përndryshe do të përballej me pasoja. I frikësuar për sigurinë e tij dhe të familjes, ai ndryshoi rutinën e përditshme dhe u largua përkohësisht nga shtëpia.

“Kam pasur shumë frikë për veten, por sidomos për familjen time. Nuk ndiheshim më të sigurt në shtëpi,” deklaroi sipërmarrësi.

Policia analizoi pamjet e kamerave të sigurisë, të cilat dokumentuan momentin kur ai u futur me forcë në furgon. Dy punëtorët, të dy me precedentë penalë, u arrestuan për rrëmbim personi dhe dhunë dhe u dërguan në burg, duke pritur të paraqiten para gjykatës për masën e sigurisë.

Avokati mbrojtës i punëtorëve ka deklaruar se gjatë procesit do të sqarohen plotësisht rrethanat, ndërsa po mblidhen prova dhe dëshmi për të rindërtuar ngjarjen në detaje.