Gjermania po ndërmerr një nismë ligjore për vendosjen e taksës mbi pijet që përmbajnë sheqer, si dhe për kufizimin e përdorimit të pijeve energjike për personat nën moshën 16 vjeç. Kjo masë synon të luftojë obezitetin tek fëmijët dhe ka mbështetje të gjerë ndërpartiake.

Propozimi pritet të hidhet në votim këtë të premte në Bundesrat, organi federal që përfaqëson 16 landerët gjermanë. Drafti nuk përcakton ende nivelin konkret të taksës, por parashikon që të ardhurat të përdoren për programe shëndetësore dhe iniciativa publike.

Kryeministri i Schleswig-Holstein, Daniel Günther, një nga iniciatorët e nismës, theksoi se industria ushqimore duhet të rishikojë formulat e produkteve. Një tjetër element i propozimit është kufizimi i energjikeve për shkak të përmbajtjes së lartë të kafeinës, taurines dhe sheqerit.

Sipas Organizatës Botërore të Shëndetësisë, mbi 100 vende kanë vendosur taksa të ngjashme, përfshirë Belgjikën, Francën dhe Portugalinë. Megjithëse CDU kishte refuzuar një propozim të ngjashëm në shkurt, zhvillimet e fundit tregojnë një ndryshim qëndrimi, me mbështetje edhe nga të Gjelbrit dhe Socialdemokratët.

Sondazhet tregojnë se rreth 60% e qytetarëve gjermanë e mbështesin këtë masë, ndërsa një studim i Universitetit Teknik të Mynihut në vitin 2024 parashikon se një taksë e ngjashme do të ulte konsumin ditor të sheqerit me 2-3 gramë për person.