Një histori e rëndë vjen nga Spanja, ku 25-vjeçarja Noelia Castillo ka vendosur t’i nënshtrohet eutanazisë këtë të enjte, duke i dhënë fund jetës së saj në një qendër rehabilitimi ku jeton prej vitesh.

E reja mbeti e paralizuar në vitin 2022 pas një ngjarjeje të rëndë që i ndryshoi jetën, duke e detyruar të përballej me pasoja të rënda fizike dhe emocionale. Që prej asaj kohe, ajo ka jetuar me dhimbje të vazhdueshme, çka e shtyu të kërkojë të drejtën për eutanazi, e cila është e ligjshme në Spanjë që nga viti 2021.

Kërkesa e saj u miratua fillimisht në vitin 2024 nga një komitet ekspertësh në Katalonjë, por u pezullua pas kundërshtimit nga familjarët. Pas një beteje ligjore që përfshiu edhe Gjykatën Kushtetuese spanjolle, në shkurt 2026 u vendos që ajo të mund të vazhdonte me procedurën, duke e konsideruar vendimin e saj të ligjshëm dhe në përputhje me të drejtat themelore.

Vetëm një ditë para procedurës, 25-vjeçarja foli publikisht për vendimin e saj, duke theksuar se dëshironte t’i jepte fund vuajtjeve dhe ta përmbyllte jetën me dinjitet. Ajo zgjodhi që momentin e fundit ta kalonte në mënyrë private, duke u dhënë më herët lamtumirën familjarëve.

Rasti i saj ka rikthyer debatin mbi eutanazinë dhe mbështetjen për personat që përballen me trauma dhe dhimbje të forta afatgjata.