Mediat shtetërore në Iran raportojnë se Udhëheqësi Suprem, Mojtaba Khamenei, ka falënderuar popullin irakian dhe udhëheqjen fetare për mbështetjen ndaj vendit “përballë agresionit”.

Megjithatë, mënyra se si është përcjellë ky mesazh mbetet e paqartë, duke shtuar edhe më shumë misterin rreth gjendjes së tij.

Prej më shumë se tre javësh nga emërimi në krye të shtetit, Mojtaba Khamenei nuk është shfaqur në publik dhe nuk është dëgjuar zëri i tij. Raportimet sugjerojnë se ai mund të jetë plagosur gjatë një sulmi ajror në ditët e para të konfliktit, ku u raportua gjithashtu vdekja e babait të tij, Ali Khamenei, së bashku me anëtarë të tjerë të familjes.

Deri tani, lideri iranian ka publikuar vetëm dy deklarata me shkrim, ndërsa fjalimi i tij i parë si udhëheqës suprem është lexuar nga një prezantues në televizionin shtetëror.

Mungesa e tij e zgjatur nga jeta publike ka ngritur pikëpyetje të shumta mbi gjendjen shëndetësore dhe aftësinë për të ushtruar detyrën në një moment kritik për Iran, ndërsa tensionet në rajon vijojnë të mbeten të larta.