Një 19-vjeçar shqiptar është dënuar në Britania e Madhe me 6 vite e 3 muaj burg, pasi tentoi të importonte armë zjarri nga Shtetet e Bashkuara dhe rezultoi i përfshirë edhe në aktivitet kriminal me drogë.

Bëhet fjalë për Henri Nikolli, i cili sipas hetimeve kishte porositur një paketë të maskuar si “kit trajnimi për qen”, por që në realitet përmbante një pistoletë 9 mm dhe pajisje për armë zjarri.

Paketa u zbulua dhe u bllokua nga autoritetet amerikane përpara se të mbërrinte në destinacion.

I riu u arrestua në prill 2025 në Hertfordshire, ku gjatë kontrollit në banesën e tij u gjetën disa armë zjarri antike të modifikuara për përdorim me municione moderne, si dhe municione, thika dhe pajisje të tjera të rrezikshme.

Po ashtu, hetuesit zbuluan edhe një ambient të përshtatur për kultivimin e kanabisit, si dhe sasi droge të gatshme për shpërndarje.

Sipas prokurorisë, 19-vjeçari kishte ngritur një aktivitet të organizuar kriminal, duke përdorur armët për të mbështetur tregtinë e drogës dhe duke rrezikuar sigurinë publike.

Autoritetet britanike theksuan se dënimi i tij përbën një goditje ndaj krimit të organizuar dhe një mesazh të qartë për këdo që përfshihet në trafik armësh dhe narkotikësh.