Drejtuesi i Ujësjellës Kanalizime Rajoni Vlorë, Klevis Kaso, është prezantuar për mediat, ku ka evidentuar problematikat në rrjetin e ujit të pijshëm dhe ka theksuar angazhimin për përmirësimin e shërbimit ndaj qytetarëve.
Ai bëri me dije se puna për projektin e ujësjellësit vijon normalisht dhe se deri më 5 maj pritet të përfundojë riasfaltimi i segmenteve rrugore, ndërsa mbeten për t’u realizuar vetëm disa lidhje në lagje të ndryshme të Vlorë.
Kaso njoftoi gjithashtu për investime të reja në rrjetin e ujit për zonat e Radhimës, Zvërnecit dhe Akërnisë, me synim përmirësimin e furnizimit dhe reduktimin e problematikave ekzistuese.
Në prag të sezonit veror, ai theksoi se janë ngritur grupe në terren për të përballuar çdo avari, ndërsa sfidë kryesore mbetet menaxhimi i furnizimit me ujë dhe reagimi i shpejtë ndaj çdo situate që mund të krijohet.
