Kryetari i Partia Demokratike, Sali Berisha, ka bërë akuza të forta publike ndaj biznesmenit në kërkim Ergys Agasi, duke e lidhur atë me aktivitet kriminal dhe mbrojtje nga strukturat shtetërore.

Gjatë një deklarate për mediat, Berisha u shpreh se Agasi është i përfshirë në lidhje të forta me krimin dhe trafikun, ndërsa shtoi se së fundmi ai është dhunuar rëndë.

“Dy javë më parë, Ergys Agasin e kanë rrahur shumë keq. Sipas qytetarit dixhital është dërguar në një spital privat. Duhet të dini se Agasi mbrohet nga shteti”, deklaroi Berisha.

Ai theksoi gjithashtu se, sipas tij, ndaj Agasit nuk ekziston një mandat ndërkombëtar arresti dhe se strukturat ligjzbatuese në Shqipëri nuk po veprojnë për ndalimin e tij.

Në vijim të akuzave, Berisha e lidhi emrin e biznesmenit edhe me zhvillime të tjera politike dhe institucionale, duke e cilësuar situatën si një tregues të lidhjeve të forta mes politikës dhe elementëve kriminalë.

Deri më tani nuk ka një reagim zyrtar nga autoritetet lidhur me këto deklarata, ndërsa mbetet për t’u parë nëse do të ketë verifikime apo hetime mbi pretendimet e ngritura.