Kryetari i Partia Demokratike, Sali Berisha, ka hedhur akuza të reja lidhur me atë që e cilëson si “skandali i AKSHI-t”, duke pretenduar se pas tij qëndrojnë figura të larta të qeverisë.

Në një dalje për mediat, Berisha u shpreh se përmasat e këtij skandali janë “edhe më lemeritëse”, ndërsa përmendi si të përfshirë bashkëshorten e kryeministrit, Linda Rama.

“Te AKSHI aty ku është Mirlinda, lexoni Linda e Surrelit. Kur e denoncova me dokumentet e prokurorisë, mediat e injoruan, por dosja qarkullon në Europë”, deklaroi ai.

Berisha u ndal edhe te zëvendëskryeministrja Belinda Balluku, për të cilën tha se është “fasada”, ndërsa sipas tij përgjegjësia reale bie mbi kryeministrin Edi Rama.

“Balluku është fasada, e vërteta është Rama”, u shpreh ai, duke shtuar se kryeministri po përdor shumicën parlamentare për të mbrojtur bashkëpunëtorët e tij.

Deri në këto momente nuk ka një reagim zyrtar nga pala e përmendur në lidhje me këto akuza, ndërsa çështja mbetet në fokus të debatit politik.