Kryetari i bashkisë së Pukë, Rrok Dodaj, ka reaguar publikisht pas situatës së krijuar në takimin e kryebashkiakëve me kryeministrin Edi Rama, ku ai nuk u lejua të merrte pjesë.

Në një sqarim zyrtar, Dodaj e cilësoi episodin si një “keqkuptim teknik”, duke theksuar se emri i tij nuk ishte përfshirë në listën përfundimtare të pjesëmarrësve për shkak të një lapsusi nga organizatorët.

Ai bëri me dije se, ndonëse kishte marrë një njoftim paraprak për pjesëmarrje dhe ishte paraqitur në ambientet e takimit, në hyrje u konstatua mungesa e emrit të tij në listë.

Sipas Dodajt, situata u sqarua menjëherë dhe organizatorët kërkuan ndjesë, duke shprehur edhe gatishmërinë për t’i mundësuar hyrjen në takim. Megjithatë, ai vendosi të tërhiqej, në respekt të organizimit të përcaktuar.

“E gjithë situata u zhvillua në një frymë korrekte dhe mirëkuptuese, duke mbetur në kuadrin e një keqkuptimi teknik”, theksoi Dodaj në reagimin e tij.