Një ngjarje e rëndë ka tronditur shtetin e Nju Jorkut, ku gjashtë anëtarë të së njëjtës familje u gjetën të vdekur në një kompleks banimi në qytetin Mechanicville. Autoritetet amerikane po hetojnë rastin si një vrasje të dyshuar e ndjekur nga vetëvrasje.

Sipas policisë, 64-vjeçarja Amy Steadman dyshohet se ka vrarë vajzën e saj 44-vjeçare, Sarah Myers, si dhe katër nipërit e mbesat: Harper (13 vjeç), Hudson (11 vjeç) dhe binjakët 10-vjeçarë Gavin dhe Gracelynn. Në banesë u gjet një shënim i shkruar me dorë dhe prova të tjera që, sipas hetuesve, e lidhin 64-vjeçaren me ngjarjen.

Hetimet paraprake tregojnë se shumica e viktimave mund të jenë helmuar, ndërsa një prej fëmijëve kishte edhe plagë të shkaktuara me mjet prerës. Në banesë u gjetën ilaçe me recetë dhe pa recetë, ndërsa rezultatet përfundimtare të autopsisë dhe analizave toksikologjike ende priten.

Trupat u zbuluan pas një kontrolli të policisë, të kërkuar nga fqinjët, të cilët kishin disa ditë pa parë familjen. Autoritetet kanë bërë të ditur se deri tani nuk ka prova për përfshirjen e ndonjë personi tjetër dhe hetimet vijojnë.

Sipas mediave amerikane, një nga pistat që po shqyrtohet lidhet me një mosmarrëveshje për kujdestarinë e katër fëmijëve, pasi babai i tyre kishte fituar së fundmi të drejtën për t’i marrë në kujdestari për një periudhë verore. Megjithatë, policia nuk ka konfirmuar ende një motiv zyrtar dhe ka theksuar se hetimi mbetet në zhvillim.