Spitali Universitar “Shefqet Ndroqi” ka shënuar një moment historik për mjekësinë shqiptare, duke realizuar për herë të parë në vend me sukses terapinë ECMO arterio-venoze (Extracorporeal Membrane Oxygenation) te një paciente 63-vjeçare.

Ministria e Shëndetësisë dhe Mirëqenies Sociale bëri të ditur se kjo procedurë e avancuar ofron asistencë të përkohshme kardiopulmonare për pacientët që vuajnë nga insuficienca e rëndë kardiorespiratore, në rastet kur zemra dhe mushkëritë nuk janë më në gjendje të mbështesin funksionet jetësore.

Sipas MSHMS-së, përdorimi i terapisë ECMO krijon mundësi të reja terapeutike për trajtimin e pacientëve në gjendje kritike dhe konsiderohet një nga teknologjitë më të avancuara në kujdesin intensiv.

“Implementimi i kësaj terapie zgjeron kapacitetet e sistemit shëndetësor shqiptar për trajtimin e patologjive të rënda kardiopulmonare dhe shënon një hap të rëndësishëm në zhvillimin e shërbimeve të kujdesit intensiv në vend”, thekson Ministria e Shëndetësisë.

Procedura u realizua nga ekipi implantues i përbërë nga Dr. Shk. Albi Fagu, Dr. Ketion Menkshi, Dr. Dervish Hasi, Dr. Marjeta Bilaj dhe Dr. Nereisa Rushiti.

Një rol kyç në suksesin e ndërhyrjes pati edhe stafi infermieror i sallës së operacionit dhe i reanimacionit, i cili u vlerësua për profesionalizmin, përkushtimin dhe punën e palodhur.

Sipas MSHMS-së, kjo arritje përfaqëson një kapitull të ri për mjekësinë shqiptare, duke rritur mundësitë për trajtimin e rasteve më komplekse dhe për shpëtimin e jetëve përmes teknologjive moderne të kujdesit intensiv.