Qeveria italiane ka anuluar autorizimin për projektin e resortit luksoz Tavolara Bay në Cala Finanza, në verilindje të Sardenjës, pasi investimi rrezikonte të shndërrohej në një skandal kombëtar, i krahasuar nga mediat italiane me projektin e debatueshëm në Shqipëri.

Departamenti për Jugun pranë Palazzo Chigi ka shfuqizuar autorizimin e dhënë më 6 shkurt 2026, duke ndalur projektin për ndërtimin e një kompleksi turistik “glamping” në territorin e bashkisë Loiri Porto San Paolo, përballë ishullit të Tavolarës.

Lajmi u bë publik nga kryetari i bashkisë, Francesco Lai, ndërsa vendimi u prit si një fitore nga banorët dhe organizatat mjedisore, të cilat prej muajsh kishin organizuar protesta dhe fushata kundër projektit.

Kundër ndërtimit dolën organizata të njohura si WWF, Legambiente dhe Italia Nostra, së bashku me dhjetëra grupe të tjera qytetare, duke argumentuar se zona është pjesë e një territori të mbrojtur ku ligji italian ndalon ndërtimet pranë vijës bregdetare.

Sipas legjislacionit italian dhe Planit Rajonal të Peizazhit të miratuar në vitin 2006, ndalohet hapja e kantiereve të ndërtimit brenda 300 metrave nga bregdeti.

Për të kapërcyer këto kufizime, kompania braziliane JHSF, një nga zhvilluesit më të mëdhenj të pasurive të paluajtshme në Amerikën Latine, kishte kërkuar që projekti të trajtohej sipas procedurave të Zonave të Posaçme Ekonomike (ZES), kërkesë që fillimisht ishte miratuar nga qeveria italiane.

Megjithatë, presidentja e Rajonit të Sardenjës, Alessandra Todde, e kundërshtoi vendimin dhe e dërgoi çështjen në Gjykatën Administrative Rajonale (TAR), ku seanca është caktuar për më 8 korrik. Ajo ka deklaruar se është e gatshme ta ndjekë çështjen deri në Gjykatën Kushtetuese, nëse do të jetë e nevojshme.

Projekti parashikonte restaurimin e një vile ekzistuese dhe vendosjen e rreth 20 kabinave të lëvizshme luksoze, pa rritur sipërfaqen e ndërtimit.

Sipas raportimeve të mediave italiane, rasti ka nxitur krahasime me projektin që dhëndri i presidentit amerikan Donald Trump synon të zhvillojë në lagunën pranë Vlorës. Në ndryshim nga ai rast, autoritetet italiane vendosën të tërhiqnin autorizimet dhe të mbështesnin kundërshtimet e banorëve dhe organizatave mjedisore, duke vlerësuar se përdorimi i procedurave të ZES do të anashkalonte mbrojtjen ligjore të peizazhit dhe mjedisit.