Një avion i kompanisë Delta Air Lines është goditur nga një fishekzjarr teksa po i afrohej pistës për ulje në Aeroportin Ndërkombëtar Midway në Çikago, gjatë festimeve të 4 Korrikut në Shtetet e Bashkuara.

Pavarësisht incidentit, avioni u ul në mënyrë të sigurt dhe nuk pati persona të lënduar.

Kompania konfirmoi se fluturimi 1076, i cili kryente linjën Atlanta–Çikago, përfundoi normalisht uljen dhe nuk ishte e nevojshme një ulje emergjente.

“Fluturimi 1076 i Delta nga Atlanta (ATL) drejt Çikagos (MDW) dyshohet se ra në kontakt me një fishekzjarr gjatë zbritjes. Avioni u ul në mënyrë të sigurt dhe më pas u drejtua në portën e terminalit”, deklaroi një zëdhënës i kompanisë.

Pas mbërritjes, avioni u tërhoq përkohësisht nga shërbimi për t’iu nënshtruar kontrolleve teknike, me qëllim verifikimin e çdo dëmtimi të mundshëm.

Sipas të dhënave të fluturimit, avioni u nis nga Aeroporti Ndërkombëtar Hartsfield-Jackson në Atlanta në orën 19:36 dhe mbërriti në Aeroportin Midway të Çikagos në orën 20:38, sipas orës lokale.

Në një regjistrim të komunikimit me kullën e kontrollit ajror, piloti raportoi goditjen e avionit nga fishekzjarri.

“Një fishekzjarr sapo goditi avionin tonë. Dëgjuam një zhurmë shumë të fortë dhe avioni duhet të kontrollohet sapo të arrijmë në portë. Shpresojmë të ketë qenë vetëm një fishekzjarr që shpërtheu poshtë nesh, por goditja ishte e fortë”, u shpreh piloti.