Konflikti mes UEFA-s dhe FIFA-s ka hyrë në një fazë të re, pasi institucioni që drejton futbollin europian po shqyrton nisjen e procedurave ligjore ndaj FIFA-s dhe presidentit të saj, Gianni Infantino.

Sipas raportimeve të mediave britanike, UEFA i ka dërguar një letër zyrtare Infantinos, ku paralajmëron se po vlerëson mundësinë e një padie, arbitrazhi ose ankese rregullatore lidhur me projektin e braktisur për shitjen e një pjese të të drejtave tregtare të Kupës së Botës tek investitorë privatë.

Projekti i FIFA-s parashikonte krijimin e një strukture të re financiare për menaxhimin e të drejtave tregtare të kompeticioneve madhore, përfshirë edhe turneun më të rëndësishëm të futbollit botëror. Megjithatë, ideja për shitjen e një pjese të aksioneve të Kupës së Botës shkaktoi reagime të forta nga UEFA, konfederata të tjera dhe sponsorë, duke detyruar FIFA-n të tërhiqej nga plani.

Në letrën drejtuar Infantinos, UEFA kërkon ruajtjen e të gjitha dokumenteve dhe komunikimeve elektronike që lidhen me projektin, duke paralajmëruar se fshirja ose humbja e materialeve që mund të shërbejnë si prova mund të sjellë pasoja ligjore.

Në procedurat e mundshme mund të përfshihen jo vetëm FIFA dhe Gianni Infantino, por edhe investitorë dhe institucione financiare të lidhura me projektin, mes tyre Joshua Kushner, Greg Maffei, JP Morgan dhe OpenEconomics.

Përplasja mes dy institucioneve më të fuqishme të futbollit është thelluar prej kohësh, ndërsa raportimet për tensionet mes presidentit të UEFA-s, Aleksander Ceferin, dhe Infantinos kanë shtuar përplasjet mes dy palëve.

UEFA kishte paralajmëruar më herët se federatat europiane mund të bojkotonin kompeticionet e FIFA-s nëse projekti do të miratohej. Edhe pse FIFA e ka tërhequr propozimin, institucioni europian nuk ka hequr dorë nga mundësia e ndjekjes së rrugës ligjore.

Sipas dokumentit të dërguar nga UEFA, FIFA-s i është lënë një afat prej pesë ditësh pune për të konfirmuar ruajtjen e të gjitha provave dhe materialeve që lidhen me projektin.