Banorë të Bashkisë Patos kanë zhvilluar sot një protestë kundër vendimit të qeverisë për riorganizimin territorial dhe propozimit për shkrirjen e Bashkisë Patos dhe përfshirjen e saj në Bashkinë Fier.

Protestuesit kërkojnë që Patosi të vijojë të funksionojë si njësi e veçantë administrative, duke kundërshtuar ndryshimin e statusit të bashkisë.

Sipas banorëve, Patosi ka kapacitete të mjaftueshme financiare dhe administrative për të përballuar shpenzimet e veta dhe nuk është ndër bashkitë që mbështeten në mënyrë të vazhdueshme nga fondet e qeverisë.

Ata e konsiderojnë këtë një prej argumenteve kryesore kundër përfshirjes së Patosit në një bashki tjetër, duke theksuar se të ardhurat e krijuara në territor janë të mjaftueshme për mbulimin e shpenzimeve.

Protestuesit paralajmërojnë se ndryshimi i statusit administrativ mund të sjellë pasoja për administrimin e territorit, ofrimin e shërbimeve publike dhe zhvillimin e zonave rurale që aktualisht janë pjesë e Bashkisë Patos.

Sipas tyre, çdo vendimmarrje për të ardhmen e Patosit duhet të marrë në konsideratë specifikat ekonomike dhe sociale të zonës, si dhe kapacitetet që bashkia ka krijuar ndër vite.

Protesta zhvillohet në kuadër të debatit për reformën e re territoriale, ndërsa banorët kërkojnë që Bashkia Patos të mos përfshihet në njësi të tjera administrative dhe të ruajë statusin e saj.