Një shqiptar 30-vjeçar, me banim në Bruksel, rrezikon një dënim prej 42 muajsh burg në Belgjikë, pasi akuzohet se ka marrë pjesë në një seri vjedhjesh në banesa në Flandrën Perëndimore.

Sipas Prokurorisë Publike, Emanuel D. ishte pjesë e një “bande hajdutësh shëtitës”, e cila kishte në shënjestër kryesisht paratë cash dhe bizhuteritë.

Grupi dyshohet se kreu nëntë vjedhje dhe tentoi edhe tetë të tjera gjatë periudhës 1–21 nëntor 2025, në zona si Jabbeke, Ichtegem, Oostkamp dhe Zedelgem.

Në mesin e sendeve të vjedhura raportohet se kishte para, bizhuteri, një orë dhe unaza martese.

U zbulua përmes kamerave dhe telefonit

Hetuesit arritën ta lidhin Emanuel D. me ngjarjet përmes kamerave ANPR, hetimeve mbi komunikimet telefonike dhe të dhënave të antenave celulare.

“Telefoni i tij ishte çdo herë aktiv në afërsi të vendeve ku ndodhën veprat”, deklaroi prokurori Lode Vandaele.

Hetuesit kanë gjetur gjithashtu në telefonin e 30-vjeçarit disa kërkime që i kanë konsideruar të dyshimta. Mes tyre ishin kërkime për një orë të markës Breitling, çmimet e arit dhe adresën e njërës prej banesave që ishte grabitur.

Bashkëpunëtori ndodhet në burg në Austri

Sipas Prokurorisë, shqiptari nuk ka vepruar i vetëm. Bashkëpunëtori i tij i dyshuar u largua drejt Italisë pas kryerjes së veprave dhe më vonë u arrestua në Danimarkë.

Ai aktualisht ndodhet në një burg në Austri për një çështje tjetër. Pas përfundimit të procedurave atje, ai pritet të përballet edhe me drejtësinë në Bruges për vjedhjet në Belgjikë.

Ndërkohë, avokati i Emanuel D., Nicolas Van Der Smissen, i ka kërkuar gjykatës të tregojë mëshirë dhe të marrë parasysh situatën familjare të klientit të tij.

“Klienti im aktualisht ndodhet nën mbikëqyrje elektronike dhe po i respekton siç duhet këto kushte”, argumentoi avokati.

Mbrojtja kërkoi që dënimi të jetë me kusht ose që pjesa e mbetur e tij të kryhet nën mbikëqyrje elektronike. Sipas avokatit, kjo do t’i mundësonte 30-vjeçarit të vazhdonte të kujdesej për djalin e tij dyvjeçar.

Prokuroria, megjithatë, ka këmbëngulur për një dënim efektiv prej 42 muajsh burg, krahas një gjobe dhe konfiskimit të automjetit tip Peugeot, i cili dyshohet se është përdorur për kryerjen e vjedhjeve.

Gjykata pritet të shpallë vendimin më 27 gusht.