Kur flitet për bukurinë e syve, ngjyra është një nga tiparet që bie më së shumti në sy, por një studim i ri ndërkombëtar sugjeron se ajo mund të mos jetë faktori kryesor që përcakton tërheqjen vizuale.
Hulumtimi i kryer nga një ekip i përbashkët studiuesish nga Bayes Business School, Universiteti i Amsterdamit dhe UCLA zbuloi se sekreti qëndron te madhësia e irisit — pjesa me ngjyrë e syrit. Fytyrat me iris më të madh, që krijon përshtypjen e syve më të ndritshëm, u vlerësuan sistematikisht si më tërheqëse nga pjesëmarrësit.
Eksperimenti me 3 mijë fotografi
Përmes disa eksperimenteve të njëpasnjëshme, studiuesit shqyrtuan se si ndryshimet e vogla në pamjen e syve ndikonin në vlerësimin e përgjithshëm të fytyrës.
Në një nga pjesët kryesore të kërkimit, shkencëtarët analizuan më shumë se 3 mijë fotografi fytyrash, të cilat u modifikuan për të ndryshuar madhësinë e bebëzave — duke bërë që irisi të dukej përkatësisht më i madh ose më i vogël.
> “Rezultati ishte i njëjtë në mënyrë të përsëritur: fotografitë ku bebëzat ishin më të vogla dhe iriset dukeshin më të mëdha u vlerësuan si më tërheqëse.”
>
Ngjyra humb peshën përballë madhësisë
Përfundimet e studimit përmbysin perceptimin e zakonshëm mbi ngjyrën e syve. Ajo që bënte diferencën nuk ishte nëse sytë ishin blu, kafe apo të gjelbër, pasi në eksperimentet e kryera ngjyra e syve nuk pati asnjë ndikim të rëndësishëm statistikor në vlerësimin e tërheqjes vizuale.