Mes kategorive më të rrezikuara nga Covid-19, siç është bërë e ditur deri tani, janë edhe punonjësit e sistemit arsimor, për të cilët, ekspertët vazhdojnë të theksojnë se duhet të jenë të vaksinuar.

Por një studim i ri ka zbuluar se mësuesit nuk rrezikojnë infektimin nga Covid- 19 më shumë se të tjerët. Në fakt, studimi i publikuar në ‘British Medical Journal’, zbuloi se punonjësit e sistemit arsimor dhe familjet e tyre kanë 50 për qind më pak gjasa të përfundojnë të shtruar në spital, krahasuar me pjesën tjetër të popullatës në kategori të tjera pune.

Rreziku i sëmundjes, citojnë më tej ekspertët, rezulton katër herë më i lartë tek punonjësit shëndetësore në vijën e parë të frontit kundër pandemisë.

Rezultatet e studimit janë premtuese dhe tregojnë se përpjekjet e shkollave për të kontrolluar infeksionin kanë qenë të suksesshme. Kjo nuk do të thotë kurrsesi që rreziku për mësuesit është zero.

Disa javë më parë, edhe Antony Fauci, drejtor i Institutit Kombëtar për Alergjitë dhe Sëmundjet Infektiveduke, theksoi që të gjithë mësuesit duhet të vaksinohen.

Po kështu, edhe qeveria italiane njoftoi se mësuesit duhet të kenë dëshmi të vaksinimit kundër koronavirusit, para se të hyjnë në klasë.

Pasaporta e Gjelbër e vaksinimit është bërë e detyrueshme edhe për udhëtarët në trena, aeroplanë, si dhe nëpër dyqane apo shërbime të tjera që lidhen drejtpërdrejt me publikun.