Policia Kufitare në Kakavijë arrestoi në flagrancë një 45-vjeçar, i identifikuar si Spiro Qose, i cili do të përballet me akuzën për “Trafikim të lëndëve narkotike”.
Gjatë kontrollit të ushtruar në automjet, është zbuluar një pako e mbështjellë, brenda të cilës kishte lëndë të dyshuar narkotike heroinë, me peshë 278 gramë.
Njoftimi i Policisë
Policia Kufitare intensifikon kontrollet për parandalimin dhe goditjen e veprimtarisë kriminale në fushën e trafikimit të lëndëve narkotike.
Goditet një rast i tentativës së trafikimit të lëndëve narkotike.
Arrestohet në flagrancë një 45-vjeçar.
Sekuestrohet një pako e mbushur me lëndë narkotike e dyshuar heroinë, 1 automjet dhe 1 celular.
Shërbimet e Policisë Kufitare Kakavije, si rezultat i shtimit të kontrolleve me qëllim parandalimin dhe goditjen e paligjshmërisë, bazuar dhe në analizën e riskut, në dalje të RSH-së, pas verifikimit të të dhënave në sistemin TIMS, kanë kaluar për kontroll në vijën e dytë automjetin tip “benz” që drejtohej shtetasi S. Q., 45 vjeç, banues në Fier.
Gjatë kontrollit të ushtruar në automjet, nga shërbimet e përbashkëta të Policisë Kufitare, Fontex-it dhe të doganës, është bërë e mundur gjetja e një pakoje të mbështjell, brenda të cilës kishte lëndë të dyshuar narkotike heroinë, me peshë 278 gramë.
Në cilësinë e provës materiale u sekuestrua lënda narkotike, automjeti dhe 1 aparat celular.
Në përfundim të veprimeve të kryera nga specialistët për Hetimin e Narkotikëve në DVP Gjirokastër u bë arrestimi në flagrancë i shtetasit S. Q., 45 vjeç, banues në Fier.
Materialet i kaluan Prokurorisë Pranë Gjykatës së Shkallës së Parë Gjirokastër për veprën penale “Trafikim i lëndëve narkotike”.
