Gjykata e Posaçme kundër Korrupsionit dhe Krimit të Organizuar ka rrëzuar për të disatën herë kërkesën e mjekut Edvin Prifti për ndryshimin e masës së sigurisë pezullim nga detyra.
Ish-shefi i repartit të Kardiokirurgjisë, po hetohet nga SPAK nën dyshimet se ka abuzuar me tenderat në qendrën Spitalore Universitare ‘Nënë Tereza’, çka ka gjasa të zgjerojë rrethin e bluzave të bardha apo zyrtarëve të tjerë të përfshirë ne veprimtari kriminale.
Kardiokirurgu është nën hetim prej muajsh, për korrupsion e pastrim parash, pasi ra në rrjetën e përgjimeve, teksa Prokuroria hetonte rastet e korrupsionit në Gjykatën e Krujës, ku sekretarja e këtij institucioni fliste për ryshfet për operacionin e nënës.
Mjeku u pezullua fillimisht nga ushtrimi i profesionit, por gjatë kontrollit në shtëpi e zyrë iu gjetën gjysmë milioni euro, prej nga u ngritën dyshime edhe për vepra të tjera penale.
Mjeku Evdin Prifti ka fituar një betejë ligjore në muajin maj të këtij viti. Apeli i GJKKO i riktheu të drejtën mjekut që të japë mësim në fakultetin e mjekësisë.
