Presidentja e Komisionit Evropian, Von der Layen ndodhet sot në Beograd, si pjesë e vizitës së saj në rajonin e Ballkanit Perëndimor.
Ajo mori pjesë në ceremoninë që shënonte fillimin e punimeve për modernizimin dhe rehabilitimin e hekurudhës Nish-Brestovac dhe iu referua dialogut midis Beogradit dhe Prishtinës. Në ceremoni ishte i pranishëm edhe Presidenti i Serbisë, Aleksandar Vuçiç. Presidenti ka pranuar se Serbia nuk mund të jetë pjesë e BE-së pa zgjidhur çështjen me Kosovën.
“Për ne, kjo është një vizitë historike, një gjë e madhe dhe e rëndësishme. Unë premtoj se delegacioni në Bruksel do të bëjë përpjekje për të arritur një marrëveshje, për të ruajtur paqen dhe për të nënshkruar më shumë marrëveshje që do të thotë një ekonomi më e mirë për të gjithë. Serbia nuk do të jetë një anëtar i BE -së derisa ne nuk do të zgjidhim marrëdhëniet me Prishtinën, por do të luftojmë dhe zgjidhim gjërat, “tha Vuçiç.
Presidenti i Serbisë, Aleksandar Vuçiç ka raportuar gjithashtu para Presidentes së KE, Ursula von der Leyen pikëpamjet e tij për dialogun dhe tensionet Kosovë-Serbi.
Vuçiç thotë se shpresonte që marrëveshja përfundimtare për tensionet e fundit të arrihej mbrëmjen e kaluar.
“Ne kurrë nuk kushtëzojmë bisedimet dhe dialogun nën kujdesin e BE -së, kjo është për ne diçka që është themelore dhe për të cilën ne jemi të përkushtuar,”- tha Presidenti serb.
Ai siguron Presidenten e KE që zgjidhja Kosovë-Serbi nuk është larg.
“Unë dua të besoj se ne nuk jemi larg zgjidhjes së problemit aktual dhe shpresoj se do të jemi në gjendje të shmangim problemet e mundshme të ardhshme, të cilat janë të rëndësishme për ne dhe për shqiptarët,” tha Vuçiç.
