Një ditë pas vendimit të bërë publik nga Gjykata Kushtetuese e cila legjitimon zgjedhjet lokale të 30 qershorit, ku opozita nuk mori pjesë, kreu i grupit parlamentar socialist Taulant Balla tha se respektimi i vendimeve të Gjykatës për “30 qershorin” është detyrim.

Sipas tij, “Presidenti si një institucion i rëndësishëm duhet të marrë vendimmarrjet në atë që përcakton kushtetuta në këtë rast”.

“Respektimi i vendimeve të Gjykatës Kushtetuese është detyrim. Natyrshëm që Presidenti i Republikës si institucion i rëndësishëm duhet të marrë vendimmarrjet në atë që përcakton Kushtetuta në këtë rast”, u shpreh Balla.

Më tej ai shtoi se nga ana e PD-së dhe partive të tjera pati përpjekje për të minuar dhe penguar zhvillimin e zgjedhjeve.

“PS është sot krenare për vendimmarrjen e vet për të garuar në zgjedhjet e 30 qershorit dhe të mos harrojmë që pati një përpjekje nga PD dhe partitë e tjera për të minuar këto zgjedhje”, tha ndër të tjera Balla.

I pyetur nëse i ka gati emrat PS për kandidatët për bashkitë që nuk kanë kryetarë, Balla tha:

“Unë s’do jap përgjigje, natyrshëm që PS është sot krenare për vendimmarrjen e vet për të garuar në zgjedhjet e 30 qershorit.

Mos harrojmë që pati një përpjekje nga PD dhe forca të tjera të opozitës së atëhershme për të minuar e penguar zhvillimin e zgjedhjeve, nuk ramë pre e presionit”.