Identifikohet emri i autorit të krimit makabër sot në Fier, ku një fëmijë pasi u mor peng, u gropos duke i sjellë atij vdekjen.
Klodian Çalamani është personi, i cili dyshohet se ka rrëmbyer dhe më pas ka groposur me baltë fëmijën 8-vjeçar.
Ngjarja e rëndë ndodhi në fshatin Grecalli të Fierit, ndersa kanë qenë familjarët ata që kanë bërë denoncimin për mungesën e djalit të tyre. Pas kontrolleve, i mituri u gjet i groposur në baltë, dhe i pajetë.
Policia ka zbuluar trupin e pajetë të fëmijës në oborrin e banesës së fqinjit. Pasi kanë parë disa kamera sigurie, familjarët kanë parë se djali i tyre kishte hyrë në banesën e fqinjit, pasi ai ishte duke lëvizur me biçikletën e autorit. Fill pas këtij episodi, familjarët njoftuan policinë që kjo e fundit të kryente kontrolle në këtë banesë.
Fier/Informacion paraprak
Sot rreth orës 15:30 është bërë njoftim nga shtetasja F. V se nuk është kthyer në banesë djali i saj i vitlindjes 2013.
Me marrjen e njoftimit shërbimet e Komisariatit të Policisë Fier kanë bërë shpalljen në kërkim dhe në mënyrë të menjëhershme nga veprimet në terren, duke vlerësuar maksimalisht situatën dhe rëndësinë e saj, kanë marrë informacion, kanë punuar në grumbullim dhe administrim të provave dhe kanë bërë të mundur gjetjen e vendit të dyshuar ku mund të ndodhej fëmija i humbur.
Mbi bazën e vlerësimit të provave, në banesën e shtetasit K. Ç., 38 vjeç, pas kontrollit, është bërë e mundur gjetja e trupit të fëmijës së dyshuar i humbur, i mbuluar me baltë.
Menjëherë është bërë kapja dhe shoqërimi i autorit të dyshuar në Komisariatin e Policisë Fier dhe nën drejtimin e Prokurorisë së Rrethit Gjyqësor Fier po punohet për kryerjen e veprimeve të plota procedurale, zbardhjen e rrethanave të ngjarjes dhe motiveve të saj.
