Varianti i ri i Covid-19 po shënon rritje dhe përhapje të madhe në shumë shtete të Europës. Por përveç kësaj, shumë prej qytetarëve kanë shfaqur panik sa i përket rrezikshmërisë që mund të përmbajë ky lloj variant. Lidhur me këto shqetësime ka folur edhe kreu i kompanisë “BioNTech”, Ugur Shahin njoftoi se varianti i ri i COVID-it “Omicron” nuk do të jetë në gjendje të shkaktojë sëmundje të rëndë apo vdekje, pasi vaksinat anti-covid ka mundësi të ofrojnë mbrojtje..

Në një intervistë për mediat Shahin iu kërkoi njerëzve të mos shqetësohen dhe mos kenë frikë për variantin e ri. I vetmi shqetësim për kreun e kompanisë “BioNTech” është fakti që ka njerëz që nuk janë vaksinuar akoma.

“Mesazhi jonë është: “Mos u frikësoni! Plani mbetet i njëjtë: Shpejtoni administrimin e dozës së tretë të vaksinës”. Besimi jonë që vaksina funksionon më së miri ndaj ‘Omicronit’ është rrënjosur në shkencë. Nëse një virus arrin shpëtim imun, mund të kapë anti-trupat, por ka një nivel të dytë përgjigjes imune që na mbron nga sëmundjet e rënda, këto janë qelizat T”, – u shpreh shefi i “BioNTech.

“Për mendimin tim nuk ka asnjë arsye për të qenë veçanërisht i shqetësuar. E vetmja gjë që më shqetëson për momentin është fakti që ka njerëz që nuk janë vaksinuar fare”, -shtoi Shahin.

Ndërkohë besimi që ka BioNTech për efektin e vaksinave të tij kundër “Omicron”është në kontrast me alarmin e përcjellë nga shefi i prodhuesit rival të vaksinave Moderna, Stephane Bancel , i cili ka ngritur mundësinë e një rënieje të efektit mbrojtës kundër variantit të ri të koronavirusit nga vaksinat aktuale.