Ministri i Brendshëm Bledi Çuçi, ka zhvilluar një takim me krerë të Policisë së Shtetit.
“Lufta antikanabis vijon të jetë një prioritet absolut edhe përgjatë vitit 2022”, kështu është shprehur ministri i Brendshëm gjatë këtij takimi.
Ai kërkoi nga drejtuesit e Policisë së Shtetit që të mos tolerojnë asnjë presion të mundshëm politik të çfarëdo niveli qoftë. Kush mbyll sytë për të toleruar kultivimin e kanabisit, do të shkatërrojë karrierën e vet, tha ministri Çuçi.
“Presionin politik për të mbyllur një sy apo për të toleruar diku e keni zero. Nga ministri apo kryeministri as që nuk diskutohet. Por çfarëdolloj sinjali sado të tërthortë që mund të merrni nga çdo faktor politik sado i lartë të jetë duhet ta refuzoni me forcë dhe të më bëni me dije mua drejtpërdrejt. Nëse i shkon nëpërmend njeriut të mbyllë një sy në lidhje me këtë gjë, do t’i shkatërrohet karriera. Dua që gjithsecili këtu ta kuptojë kështu siç e thashë unë. Ju lutem shumë të mos bëjë gabim njeri që të tolerojë apo mbyllë sytë”, theksoi Ministri i Brendshëm.
Sipas tij beteja në luftën kundër kultivimit dhe trafikut të kanabisit është shumë e rëndësishme për Shqipërinë.
“Ju jepet juve mundësia që të bëni një gjë të mirë për Shqipërinë. Dhe mbase nuk mund të ketë gjithnjë momente të tilla gjatë karrierës tuaj”, iu drejtua ministri Çuçi krerëve të Policisë së Shtetit.
Më tej ai evidentoi disa nga treguesit e efikasitetit në luftën kundër kanabisit përgjatë vitit 2021, ku domethënëse është rritja e çmimit në treg për shkak të mungesës së prodhimit. E po kështu, Guardia di Finanza ka konfirmuar se gjatë vitit që lamë pas nuk ka kapur drogë që mbërrinte nga Shqipëria.
