Presidenti i vendit Ilir Meta në një konferencë nga zyra e tij, ka njoftuar se ka firmosur kallëzimin penal ndaj strukturave dhe funksionarëve të Kuvendit, për falsifikim dokumentesh.

“Sot kam firmosur kallëzimin penal si president i Republikës, kundër strukturave, funksionarëve përgjegjës në Kuvendin e Shqipërisë, për veprat penale të kryera në bashkëpunim, atë të falsifikimit të dokumenteve.

Për të mos ju marrë më shumë kohë, sapo kallëzimi të depozitohet në prokurorinë e posaçme dhe në prokurorinë e Tiranës, menjëherë do ta publikojmë të plotë, me gjithë sqarimet përkatëse”, u shpreh Meta.

Teksa u pyet nga gazetarët nëse do ta njohë vendimin e Kushtetueses, Meta u shpreh se nuk do të ketë asnjë bravë shtesë në Presidencë dhe nuk do të blindohet asnjë derë.

“Ju thoni nëse 24 korriku është sot, do të doja të ishte që dje. Nuk do të ketë asnjë bravë shtesë në Presidencë, nuk do të blindohet asgjë. Në 24 korrik do bëjmë një festë dhe aty është populli i 2 marsit. Me këto falsifikimet e fundit është shumë i irrituar, por duhet të ruajmë vetëpërmbajtjen. Kur palët sillen normalisht Presidenti sillet si danez.

Kur kërcënohet rendi kushtetues, kur nxitet artificialisht një konflikt dhe ju i dini kush i ka nxitur dhe tashmë filmi dhe teatri janë rrëzuar, sigurisht që presidenti do jetë njësh me Kushtetutën me interesin publik, kombëtar me pluralizmin politik.

Ta harrojnë ata që kanë menduar në mënyrë mafioze, gjithë ata rilindas vendas dhe ndërkombëtar, vendas mavi dhe blu, se do të varrosin ‘de facto’ pluralizmin politik në Shqipëri dhe do të dhunojnë popullin e Shqipërisë, do të dëshpërohen pa fund. Do të marrin përgjigjen e merituar. Për këtë ju jap fjalën. Jam Ilir Meta u them atyre o superbudallenj”, tha Presidenti në fjalën e tij.