Presidenti i Republikës, Ilir Meta, formalizoi dje guvernatorin Gent Sejko edhe për shtatë vjet të tjera në krye të Bankës së Shqipërisë.
Me përfundimin e mandatit në 5 shkurt, kreu i shtetit i propozoi Kuvendit të Shqipërisë emrin e guvernatorit në fuqi për t’u rizgjedhur guvernator i Bankës.
Dekreti pritet të kalojë për votim së shpejti në legjislativ, pasi për postin e guvernatorit duhet të ketë dakordësi midis Presidentit dhe Kuvendit. Nëse zgjidhet, ky do të jetë mandati i dytë dhe i fundit i Sejkos si guvernator i Bankës së Shqipërisë, pa të drejtën për t’u rizgjedhur sërish.
DEKRETI
Me një njoftim për mediat, Meta argumenton propozimin e tij teksa shkruan se vlerëson politikën e Bankës së Shqipërisë për të ofruar mbështetjen e nevojshme për rimëkëmbjen ekonomike si pasojë e tërmetit dhe pandemisë, si dhe për të lehtësuar konsolidimin fiskal.
“Vlerësojmë politikën e Bankës së Shqipërisë, që ka qenë akomoduese për të ofruar mbështetjen e nevojshme për rimëkëmbjen ekonomike si pasojë e tërmetit dhe pandemisë, si dhe për të lehtësuar konsolidimin fiskal. Gjithashtu, është për t’u nënvizuar roli i Bankës së Shqipërisë për të siguruar, që sektori financiar të mbetet i qëndrueshëm dhe likuid.
Megjithatë, në kushtet kur inflacioni total është rritur për shkak të çmimeve më të larta të ushqimeve dhe energjisë, Banka e Shqipërisë duhet të vazhdojë të monitorojë nga afër zhvillimet e inflacionit dhe të rregullojë qëndrimin e politikës në përputhje me objektivin e saj për ruajtjen e stabilitetit të çmimeve”, nënvizohet në dekretin e presidentit propozuar Kuvendit, ku veç të tjerash theksohet roli që duhet të luajë Banka për të siguruar stabilitet financiar.
Prej 5 shkurtit 2022, guvernatorit të Bankës së Shqipërisë i ka mbaruar mandati 7-vjeçar. Gent Sejko u emërua guvernator 5 shkurtin e vitit 2015 nga Kuvendi, bazuar në dekretin e Presidentit të asaj kohe, Bujar Nishani.
Emërimi i Sejkos erdhi pas ndërprerjes së mandatit të Ardian Fullanit, i cili u shkarkua nga Këshilli Mbikëqyrës pas arrestimit për vjedhjen në thesarin e shtetit.
