Komisioni i Rithemelimit në Partinë Demokratike, vazhdon procesin zgjedhor për kryetarët e degëve të kësaj force politike, ku këtë të hënë do të votohet në qytete të rëndësishme si Shkodra, Lezha,Korça apo Mirdita.
Në Shkodër votimi po kryhet në ambientet e teatrit “Migjeni”, ndërkohë që në garë janë 4 kandidatë, Arben Lusha, Gjenarin Kapçari, Vildane Gushta dhe Elvis Deda. Gjatë ditës së djeshme 3 kandidatë u tërhoqën nga gara për kreun e PD-së, ndërkohë që sot votimi ka nisur normalisht pa vonesa. Dega e Shkodrës është një prej më të mëdhajave në PD, ku llogaritet të jenë rreth 6 mijë votues.
Për kreun ePD-së në Korçë, kandidatët janë Devis Osmani, Ledina Alolli, Arben Fezolli dhe Mateo Balli. Në lista votues ka rreth 2800, ndërkohë që procesi është duke u mbikqyrur nga Edith Harxhi, përfaqësuese e Komisionit të Rithemelimit.
Ndërkohë në Lezhë janë 3 kandidatë në garë, dhe rreth 3800 votues. Kandidatët janë Arben Ndoj, Anton Gjoni dhe Alen Kola. Në Mirditë kandidat janë Gjon Ndoj, Albert Melyshi dhe Aleksander Picaku dhe numri i anëtareve të thirrur për të votuar është rreth 1200.
Edhe pse fati i drejtimit të PD-së është ende në Gjykata, dhe grupi parlamentar më i përçarë sesa kurrë, Komisioni i Rithemelimit, nuk hoqi dorë nga mbajtja e zgjedhjeve, duke pretenduar të jetë organi drejtues legjitim i partisë.
Nga ana tjetër, kryetari i komanduar pas dorëheqjes së Lulzim Bashës, Enkelejd Alibeaj, publikoi një platformë të mbështetur nga 30 deputetë, ku kërkonte ndërprerjen e procesit zgjedhor të nisur në bazë, si hapi i parë për të sjellë edhe bashkimin e Partisë.
Njoftim i Komisionit të Organizimit dhe Kontrollit të Operacioneve Elektorale:
Komisioni i Organizimit dhe Kontrollit të Operacioneve Elektorale të Partisë Demokratike njofton se po zhvillohen zgjedhjet për Kryetar të PD në 9 degë.
Procesi i votimit ka filluar në orën 8.00 e do vijojë deri në orën 18.00. Nëse do ketë anëtarë që nuk kanë votuar në Qendrën e Votimit, procesi do të shtyhet edhe pas orës 18.00 derisa të ketë votuar edhe anëtari i fundit i PD.
Komisioni i Organizimit dhe Kontrollit të Operacioneve Elektorale fton të gjithë anëtarët e PD të degëve të sipërpërmendura të bëhen pjesë e procesit të votimit për zgjedhjen e Kryetarit të degës së tyre sipas parimit “një anëtar një votë”, për një Parti Demokratike më të bashkuar, më të fortë e më të hapur.
Kandidatët për Kryetar dhe qendrat e votimit sipas degëve janë në tabelën bashkëngjitur.
