Kancelari gjerman, Olaf Scholz, ka reaguar ndaj akuzave se qasja e tij ndaj agresionit rus ka qenë hezituese. Ai ka këmbëngulur se vendimet e tij pasuan konsultimin e ngushtë me aleatët e Gjermanisë dhe u përpoq të shmangte çdo dyshim se vendi po vepronte i vetëm.

Scholz është përballur me kritika të ashpra edhe nga brenda qeverisë së tij teksa javën e kaluar u vu nën kritika nga lideri i opozitës, Friedrich Merz. Merz e akuzoi atë për udhëheqje të dobët dhe për “zvarritje, ankth dhe ndrojtje”.

Scholz u duk se ra pre e presionit të jashtëzakonshëm të brendshëm dhe ndërkombëtar javën e kaluar duke njoftuar se Gjermania do t’i dorëzonte Ukrainës armatim të rëndë, në formën e sistemeve kundërajrore vetëlëvizëse dhe kjo duket si një kthesë e mprehtë e politikës gjermane.