Komiteti Ndërkombëtar i Kryqit të Kuq ka konfirmuar nisjen e procesit të evakuimit, për civilët e bllokuar në qytetin e Mariupolit.

“Konfirmojmë se një operacion evakuimi i sigurt është duke vazhduar, në koordinim me OKB-në dhe palët në konflikt,” tha një zëdhënës i Kryqit të Kuq.

Kollona për evakuimin e civilëve filloi më 29 prill, përshkoi rreth 230 kilometra dhe arriti në fabrikën në Mariupol të shtunën në mëngjes, sipas kohës lokale.

Kryqi i Kuq këmbëngul në faktin se asnjë detaj nuk mund të ndahet me publikun, pasi mund të rrezikojë seriozisht sigurinë e civilëve dhe kolonës.

Evakuimi i civilëve është konfirmuar dhe nga presidenti ukrainas Volodymyr Zelensky, i cili përmes një postimi në Twitter shkruan se një grup prej rreth 100 personash janë larguar të parët nga fabrika e çelikut Azovstal në qytetin jugor

Ai shtoi se civilët pritet të mbërrijnë në qytetin e Zaporizhzhia nesër.

“Filloi evakuimi i civilëve nga Azovstal. Grupi i parë prej rreth 100 personash tashmë është nisur drejt zonës së kontrolluar. Nesër do t’i takojmë në Zaporizhzhia. Faleminderit ekipit tonë! Tani ata, së bashku me OKB- në, po punojnë për evakuimin e civilëve të tjerë nga uzina”, shkruan Zelensky në Twitter.