Prej afro 1 ore vijon që të jetë e bllokuar rruga në Rinas, me banorët e fshatit me të njëjtin emër që kanë dalë për të protestuar kundër vendimit të ARRSH, që ky aks rrugor të jetë me një lëvizje.

Qytetarët shprehen se janë bllokuar për të kryer veprime të përditshmërisë së tyre, ndërkohë që kryeplaku i fshatit është besimplotë në gjetjen e një marrëveshje.

“Janë në negociata, kam besim të plotë se këtij problemi do ti jepet zgjidhje. Zgjidhja do të jetë që rruga të jetë me dy sense siç ka qenë”, u shpreh kryeplaku i fshatit.

Ndërkohë që banorët janë hezitues, dhe thonë se deklarata e tij u bë nën presion.

Banori 1: Jeni të detyruar që të bëni 22 kilometra për 1 kilometër, nuk kemi parë asnjë lloj njoftimi, qoftë edhe një letër që ta kishin vendosur aty, as minimalen nuk kanë bërë, kjo është mënyra e vetme që mund të bëjmë rezistencë.Të na arsyetojnë, të na bindin se pse kjo rrugë nuk na hapet. As këtë nuk e bëjnë ata.

Banori 2: Janë gati 1 mijë banorë që preken nga devijimi i kësaj rruge, është i gjithë fshati i Rinasit, kemi shkollën, kemi ambulancën, një veprim që duhet të bëjmë, më shkon 40 mijë kilometra në ditë vetëm me pi kafen ku e pi çdo ditë, është keqmenaxhim. Ata do të qetësohen, dhe do mendohen më mirë, Qafa Kasharit do të mbledhë gjithë Shqipërinë në një rrugë, që edhe aty është vetëm me një kalim.