Në kuadër të 5 Majit, Ditës së Dëshmorëve të Atdheut, Drejtues të DVP Vlorë dhe të Komisariatit të Policisë Vlorë kanë organizuar ceremoni përkujtimore në nderim të punonjësve të Policisë të rënë në krye të detyrës.

Në kujtim të aktit sublim të tyre, Drejtori i Drejtorisë Vendore të Policisë Vlorë Kryekomisar Gentian Berberi dhe Drejtori i Kufirit dhe Migracionit Kryekomisar Shpëtim Hasanaliaj vendosën kurora me lule pranë Varrezave të Dëshmoreve, si edhe zhvilluan vizita tek familjarët e të rënëve në krye të detyrës.

Bashkia Vlorë, në nderim të kujtimit të Dëshmorëve të Policisë së Shtetit, emërtoi një shesh të kësaj bashkie, me emrin e Dëshmorit Ilir Ngresi.

Në ceremoninë e zhvilluar në sheshin që mori emrin e Dëshmorit Ilir Ngresi, ishin të pranishëm përfaqësues nga pushteti vendor, familjarë të Dëshmorit, të afërm të familjarëve, nxënës të shkollave dhe drejtues të Drejtorisë Vendore të Policisë Vlorë.

Në këtë ceremoni u vlerësua vepra heroike dhe akti sublim i Dëshmorit të Policisë së Shtetit.

Kryetari i Bashkisë, z. Dritan Leli ka përgëzuar nismën e ndërmarrë nga Drejtori i Përgjithshëm i Policisë së Shtetit, i cili i ka kushtuar një rëndësi të veçantë nderimit të kujtimit të Dëshmorit të Policisë së Shtetit, me propozimin për të emërtuar një shesh të qytetit, me emrin e tij.

Gjithashtu, Drejtori i Drejtorisë Vendore të Policisë Vlorë, Kryekomisar Gentian Berberi, ka falënderuar drejtuesit e pushtetit vendor, për bashkëpunimin e treguar për emërtimin e një sheshi në territorin e kësaj bashkie, me emrin e Dëshmorit të Policisë së Shtetit Ilir Ngresi, i cili do të mbetet përjetësisht shembull frymëzimi për brezat e rinj.