Ish-kryeministri Sali Berisha ka lajmëruar për ditën e shtunë protestë të heshtur në të gjitha Komisariatet e Shqipërisë, ku do të ndizen qirinj në nder të 31-vjeçarit Ilvi Meta që u gjet i vdekur në paraburgimin e Kavajës.

Berisha gjatë konferencës ka kërkuar edhe dorëheqjen e ministrit Bledi Çuçi për rastin e vdekjes së të riut në komisariatin e Kavajës, Ilvi Meta.

“Ministri i familjes që në vend të merret me zbatimin e ligjit, është gardian i interesave kriminale të klanit Rama. Drejtori i Përgjithshëm i Policisë heshti sikur nuk ka ndodhur asgjë. Kjo është dhe më kriminale.

Heshti në një kohë kur në një hark kohor 5-javor 2 të rinj u vdiqën në qelitë e komisariatit të policisë ku duhet të ishin më të sigurt. Duke dënuar këtë qëndrim çnjerëzor të drejtuesve të shtetit, kërkoj dorëheqjen e menjëhershme të ministrit Çuçi.

Ndërkohë unë do t’i propozoj sot Komisionit të Rithemelimit nesër para të gjitha komisariateve të Shqipërisë në orën 8 të ndizen qirinj në një protestë të heshtur paqësore, stop vrasjeve në Komisariate.”, tha Berisha.