Drejtuesi politik i Partisë Socialiste për qarkun e Fierit, Taulant Balla së bashku me kryetarin e Bashkisë Fier Armando Subashi dhe deputetë e qarkut morën pjesë në Festën e Grurit në Pojan, festë e cila tashmë është kthyer në një traditë të përvitshme për zonën e Myzeqesë.
Në fjalën e tij Balla u shpreh se ky vit ka prodhim më të lartë se një vit me pare si dhe u bëri thirrje fermerëve që të bëhen bashkë dhe të mos bien pre e abuzimeve të blerësve.
“Ky vit ka qenë i mbarë për të mbjellat e grurit dhe ka pasur prodhim më të lartë se një vit me pare dhe këtë vit çmimi i grurit do të jetë mbi 50 lekë, që do të thotë që është një çmim dyfish më i lartë se viti i kaluar dhe unë besoj që i gjithë prodhimi i grurit vendas jo vetëm që do të shitet, por do shitet me një çmim më të lartë. E rëndësishme është që të gjithë fermerët të bëhen bashkë dhe të mos bien pre e abuzimeve të blerësve. Prej 30 vitesh jemi në ekonomi tregu dhe në kushtet që në tregun global ka një rritje të madhe të drithërave besoj që nën këtë çmim asnjë prej fermerëve nuk do të jetë me humbje”, deklaroi Balla.
