Ministria e Turizimit dhe Mjedisit ka reaguar në lidhje me lajmet e publikuara në mediat greke mbi propozimin kryetarit të Bashkisë së Korfuzit Verior, George Machimaris, për transferimin e ujit nga ‘Syri i Kaltër’ drejt ishullit grek.

Përmes një postimi në facebook, ministria deklaron se pretendime të tilla janë të pavërteta dhe se nuk ka asnjë marrëveshje apo diskutime të këtij lloji për një projekt të tillë.

Reagim i Ministrisë së Turizmit dhe Mjedisit

Ministria e Turizmit dhe Mjedisit, nisur nga disa lajme të përhapura në media të ndryshme mbi një propozim/memorandum teknik të supozuar të furnizimit me ujë me transferim burimi nga Syri i Kaltër drejt Korfuzit, sqaron:

Nuk ka asnjë marrëveshje të tillë dhe as nuk ka pasur diskutime për një projekt të ngjashëm sipas lajmit të përhapur nga mediat. Pretendimet e ngritura janë të pavërteta.

Syri i Kaltër është një pasuri natyrore e Shqipërisë, i cili me vendimet e muajit janar 2022 ka marrë një status më të lartë mbrojtjeje, atë të “Parkut Natyror” me një sipërfaqe të rritur në 293 hektarë, për të mbrojtur më mirë Monumentin e Natyrës me të njëjtin emër, që mban brenda parkut.