Mediat e rëndësishme botërore kanë raportuar ditën e sotme në lidhje me ngjarjen e ndodhur në Gramsh, ku tre shtetas, rusë dhe ukrainas janë arrestuar pasi tentuan të hynin në uzinën e armëve, dhe pasi nuk i janë bindur urdhrit për të ndaluar, kanë spërkatur dy ushtarët shqiptarë me lëndë kimike në fytyrë.
The Moscow Times, shkruan se një nga personat e arrestuar dyshohet se sulmoi rojen teksa përpiqej të fotografonte fabrikën e Gramshit e cila përdoret për çmontimin e armëve të vjetra.
“Dy ushtarët shqiptarë të plagosur u dërguan në spitalin e Tiranës pasi pësuan lëndime në sy. Kryeministri shqiptar Edi Rama tha se tre personat ishin “të dyshuar për spiunazh”.
Policia ushtarake, së bashku me agjencitë e inteligjencës dhe antiterrorizmit, shkuan në vendngjarje për të hetuar ngjarjen. Shqipëria është anëtare e NATO-s që nga viti 2009”, thuhet në artikullin e medias ruse.
