Në prag të sfidës së 25 gushtit në stadiumin “Air Albania”, boksieri i njohur shqiptar, Florian Marku u prit në një takim nga kryebashkiaku i Tiranës, Erion Veliaj. Ai ftoi të gjithë qytetarët shqiptarë që të bëhen pjesë e kësaj feste, për të bërë tifo për boksierin kampion shqiptar.
Kreu i Bashkisë u shpreh se, mbi të gjitha, Florian Marku është një shembull për të rinjtë se vetëm puna e ndershme të çon në majë.
“Nuk është zgjidhje as shtëpia e barit, nuk është zgjidhje as ikja me gomone, nuk është zgjidhje as jeta e pandershme për një fitim të shpejtë. E vetmja zgjidhje që ka funksionuar sa jeton njerëzimi, por edhe siç e mësuam nga Luiza Gega, siç e kemi mësuar nga Flori, nga Dua Lipa e Rita Ora, është se vetëm puna, djersa, përpjekja dhe sakrifica e jashtëzakonshme të çon në majë. Sot Flori është në majë se mbi të gjitha është një djalë i mirë, është një sportist i mirë, është një familjar i mire”, nënvizoi Veliaj.
Boksieri Marku, i cili garon për mbrojtjen e titullit Kampion Bote, falenderoi kryebashkiakun Erion Veliaj për përkrahjen e vazhdueshme të sportit dhe sportistëve.
“Erion, faleminderit për përkrahjen, i presim të gjithë shqiptarët më datë 25 Gusht në “Air Albania”, tha ai.
Në fund të takimit, Florian Marku i dhuroi kryebashkiakut Veliaj një dorezë boksi të nënshkruar prej tij.
