Ndërkohë që një pallat nën pronësinë e tij në zonën e Farkës u sekuestrua javë më parë për disa kate të ndërtuara pa leje, kompania e Pëllum Salillarit ka marrë një tjetër tender nga Fondi Shqiptar i Zhvillimit për restaurimin e kalasë së Ali Pashë Tepelenës.

Në arsyetimin e bërë nga Fondi Shqiptar i Zhvillimit, bie në sy arsyeja e cila mund të konsiderohet “qesharake” për të alokuar plot 5.4 miliardë lekë të vjetra për restaurimin e kësaj kalaje. Sipas arsyetimit të Fondit Shqiptar të Zhvillimit, llaçi i përdorur për ndërtimin e kalasë plot 200 vite më parë, kishte qenë jo cilësor.

“Gjendja e monumentit nuk është e mirë, pasi materiali lidhës i gurëve, llaçi i gëlqeres nuk ka qenë i cilësisë së lartë në kohën e ndërtimit. Një nga arsyet e kësaj dobësie është dhe puna e nxituar që shoqëroi ndërtimin e këtyre fortesave. Kjo dukuri vihet re më qartë në ndërtimet e brendshme ku muratura e tyre është shkërmoqur dhe është në degradim të vazhdueshëm”, thuhet në dokumentat e tenderit.

Ndërsa pak ditë më parë, Salillari arriti të fitojë, pa garë, një tjetër tender prej 2.5 milionë eurosh për thellimin e basenit të Triportit në Vlorë.